Girječálli Inger-Mari Aikio lea veahkkálagaid áhčiinis Jávrri-Juhán Niillasiin čohkken girjji iežaska ruovttubáikki Buolbmatjávrri birra.
Buolbmatjávri - jávri mii dolin lei vuotna. Áidna jávri gos eallá finddar. Jávri gosa goargŋu diddi ja luosjuolgi ja gos leat goddon maid ággarasat. Áidna báiki Suomas, gos šaddá miesttadaŋas. Buolbmatjávrri luondu leamašan álo eallima geađgejuolgi. Rievssat, rieban ja reaská, dat lei dološ olbmuid birgenláhki.
Buolbmatjávri - báiki gos leat eallán máŋggalágan stuorra persovnnat. Elle-Máret, gii reaskabivddus čurtii meahccefáktii, gii jearahii bivdolobiid. Ásllat-Ánde, gii oahpahalai matematihka ruohtti luhtehiiguin. Risten-Mággá, gii biepmai skiriid, mearralottiid, bohccuid ja buot heakkalaččaid. Jávrri-Ásllat, gii gávnnahalai borramis suoláduvvon heastta vuoivasa. Mihkku gii báinnii, oljii ja čogui vuovttaid nu, ahte juohke áidna vuoktačalbmi lei njuolga. Gulman Ásllat, gii goalkalii čuimmiin duiskalaš hearrá oaivái. Jávrri-Jovnna, gii gearregasttii lohkameahttun gerddiid leansmánne vuostá. Hánnoš-Niillas, gii lávii láhppit lássačalmmis ja gárgidii álo bággobarggus.
Girji addá saji olbmuid muitalusaide. Dasa mo olbmot leat vásihan áššiid, mo sii daid muitet dahje maid sii leat gullan. Dasa lassin fárus leat čállosat ja dieđut lottiin, šattuin, dološ ássansajiin, ealáhusain ja ođđa áiggi joavdamis Buolbmatjávrái.